2Ti 2 | KYG | STEP | Ani kava'mo hu'niya'mofe'mo kagaemo mafa'ne'nimogamo Kalaisi Yesu'a fiku kaha maeno kami'niya kavateti'mo lokiya vaika maiyo.

2 Timothy 2

Alagepa ati vekamo maiyo, huno ha pai'niya gemae

1 Ani kava'mo hu'niya'mofe'mo kagaemo mafa'ne'nimogamo Kalaisi Yesu'a fiku kaha maeno kami'niya kavateti'mo lokiya vaika maiyo. 2 Nagaemo muki vaya'aife'mo ae'na hakalo hu'na hapa pai'nogekae'mo apakae'e'mo magokepi lokaeka mai'nekae'mo kagaemo ago afi'nane. Kagaemo ani afi'nana gemo muki afina'mo alagepa hu'a ali'ya'mo ne'aliya vaya'mogi ani gele'mo yagai'a atesayafe'mo alika apamige'apao ali'ne'a mago'e hu'a alu vaya'aina ali'a apaya maleyo. 3 Ani kavatefe'mo kagaemo Yesu Kalaisi alagepa ati veka'agana huka mai'neka kanamo alige alige huka maiyo. 4 Ati vaya'mogimo kame hisayafe'mo ma mopafi ya'mo'a apatafauno apatesiya agufa ali'ya'mo no'aliye. Ati ali'yate'mo apavaleno alino apate'niya vekamo'a amuse huno apatesiyafe'mae. 5 Nagu nagu hu'a yokalo nelaya vaya'mogimo nagu nagu hisaya ke'aepa gemo akame osisayana hu male'naya ya'mo afa'a o'aligae. 6 Hoyamo ayamufa valeno alino ne'vaiya vekamo'a hogoteno hoya'afati'mo lesiya ne'ya'mo aligiye. 7 Mani nehuva gee'mo kagesa afifi huka mai'negeno'ao Ala kava ne'mo'a alino kamisigekae'mo muki ge'amo afika aeto hugane. 8 Yesu Kalaisi'a Nevini aginago'amo'mo alagepa faigoko ge'nilefe'mo fali'niyateti'mo ago alino he tino ate'niya kavafe'mo kage okanika kagesa afifi huka maiyo. 9 Mani Goti gelefe'mo hu'apae'mo, hosu kava'mo nehiya vekamo mai'niye, hu'a hute'a nofi ki'a nate'naya'monanafa Goti ge'amo aino atagu ofaesiyafe'mo nofi ki'a o'ate'nae. 10 Nagaemo lekana paino apate'niya vaya'mo Kalaisi Yesupi'mo mai'nisageno Goti'a apakufamo alino katino apatesige'apae'mo ha le konali ya'amo alite'a maige maige hu'a maisayafe'mo Goti ali'ya'amo o'atale'na ne'ali'nae'mo muki alu kana ya alu kana ya'mo ne'aluve. 11 Lama gee'mo lagesa afita fatago nehuna gemo hane'niyana, Agae'e'mo fali'nisunana agae'e'mo afa'a maigune. 12 Alagi o'ataleta kanamo alime alime ne'visunana kini vayakana huta agae'e'mo magokepi lokaeta mai'neta yagaita apategaune. Lagaemo agaefe'mo o'age'nona vekae, huta nehisunana lagaefe'mo o'apake'nova vayane, huno hugiye. 13 Lagaemo, akame hugune, huta hutetae'mo akame nosisunana agaemo huguve, huno hu male'nisiya gemo akame hugiye. Huguve, huno nehiya gemo alagi o'ataleno afa'a akame nehiya vekamo mai'niya'mofe'mae.

Alagepa huka ali'ya'mo aliyo, huno ha pai'niya gemae

14 Ani gee'mo muki afina'mo apakesamo afisayafe'mo ina ge huka hapa paiyo. Ala kava ne'mo aulagale'mo mai'ne'nae'mo, alu ge alu geleti'mo ge vaitapa kaveta osiyo, huka hapa paiyo. Ani agufa gemo'a afisaya vaya'aina hapa o'maegaifa alino hosu huno'age'mo apategaiye. 15 Goti'a kagaefe'mo, Naulagale'mo alagepa ali'ya'mo ne'aline, huno husiyafe'mo kayamukiki huvo. Avagage osisiya agufa ali'ya'mo ne'aliya vekagana huka lama gelefe'mo alagepa huka ali'ya'mo aliyo. 16 Aligana'monanafa ma mopafi ge'e afa ge'e'mo nehisagekae'mo maika halove huka apato. Ani agufa gemo'a hapa o'maesige'a Gotife'mo mono osu'a mago'e hu'a hosu kava'mo hugae. 17 Ani agufa hosu gemo'a apamu'mo apaleteno ko nesiya agufa kavakana huno aleme aleme uno ko sino alopa hegaiye. Ani agufa gemo ali'ana apaya male'na'a vekala'mo Haimeniyasi'e Failitasi'e'mo mai'na'ae. 18 Anakaemo alagepa ka'mo atale u'anae'mo, agaegi'e'mo ago he ti'nonanageta falisunateti'mo halate he otigune, hu'ana hapa pai'na'age'apae'mo mago vaya'amogi apakesa afi'a fatago hu'naya kava'apimo'mo heleve hugekana huno asagauno ai'niye. 19 Asagauno ai'niya'monanafa Goti no'amo lokiya yafate'mo faino ate'niya yafa'mo afa'a hane'niye. Goti'a faino ate'niya yafate'mo alagena ya'mo hu male'niya yate'mo hane'niya gemo'a huno'ae'mo, Ala kava ne'mo'a vaya'amo apake'niye, huno huteno mago'e gemo'a huno'ae'mo, Muki vaya'amogimo Kalaisi agi'amo ne'aya vaya'mogi hosu kavategati'mo atale'a viyo, huno hu male'niye.

20 Goti vaya'amo afa'a maigaya'monanafa alopa nopi'mo lusi monileti'mo miya nefaiya yuvapamo goli yafateti'mo alo hu'naya yuvapa'e siluva yafateti'mo alo hu'naya yuvapa'age'mo ohane'nifa yosaleti'mo alo hu'naya yuvapagi mopaleti'mo alo hu'naya yuvapa'enagi huno hane'niye. Mago yuvapa'amo alagepa ali'ya'mo alisiya yuvapamo hane'nigeno mago yuvapamo'amo hosu ali'ya'mo alisiya yuvapamo hane'niye. 21 Mago vekamo'a ani hosu yatefe'mo aeno kalo paeno atesigeno'ae'mo alagepa yuvapagana huno mai'nisigeno kava veka'amo'a muki alagepa ali'ya'ale'mo avaleno ategaiye. 22 Neya vaya'mogimo apakufamo'mo hau'niya kava'mo nehaya kavategati'mo ataleka kaune hetaleka eka yaveyave apaipafati'mo Ala kava nefe'mo ge nehaya vaya'e'mo magokepi'mo lokaetapa mai'netapae'mo fatago kavanagi lapau lapayamopafi'mo nelapaiya kavanagi yuna lapaipa nekaliya kavanagi hutapa atafausayafe'mo vegala aeyo. 23 Negi malete'a fiku gemo huge afige hu'a ne'maisaya'mo'mo ago afi'nanana gege'mo vaige vaige hu'a maigayanagi maika halove huka apato. 24 Ala kava ne'mo ali'ya'amo ne'alisiya vekamo'a geleti'mo kaveta osuno muki vaya'aitegamo yagu yaga kavake'mo huge alagepa huno alino apaya malege o'afi'nisaya vaya'aife'mo aipamo leno o'apateno yuna aipamo kalino apatege huno maisiya vekage'mo maino. 25 Agaemo gemo amagi'a ne'atagaya vaya'aife'mo himu'namu gefati'mo osuno vase vase gemo huno alino api aino apategaiye. Goti'a apaipamo alino afe leno apatesige'apae'mo lama ge'amo afisafi o'afisafi, huno vase vase gefati'mo hugiye. 26 Satani'mo ge'amo akame hisayafe'mo ane'aifi'mo hegekana huno apatafau'niye. Alagepa ali'ya'mo ne'aliya vekamo'a apakaetegamo ge hugefe'mo huno'ae'mo vase vase huno ge hisige'apae'mo ane'aifati'mo ae'a kasalo paegae.